ଖ୍ରୀଷ୍ଟମାସ (ବଡ଼ ଦିନ) ର ଋତୁ
ଏହା ପୁଣି ଖ୍ରୀଷ୍ଟମାସ (ବଡ଼ ଦିନ) ଋତୁ ! ସମଗ୍ର ବିଶ୍ଵରେ ଲୋକମାନେ ଏହାକୁ ଆନନ୍ଦ ଏବଂ ବହୁତ ମଜା ସହିତ ପାଳନ କରନ୍ତି । ଖ୍ରୀଷ୍ଟମାସ ଅବସରରେ ଅନେକ ପିଲାମାନେ ସାଣ୍ଟାକ୍ଲଜର ଉପହାରକୁ ଅପେକ୍ଷା କରନ୍ତି । ବ୍ୟବସାୟ ପାଇଁ ଏହା ମଧ୍ୟ ସର୍ବୋତ୍ତମ ଋତୁ । ଲୋକମାନେ ଉତ୍ସବ ପାଇଁ ଉପହାର, ସାଜସଜ୍ଜା, ଏବଂ ସାମଗ୍ରୀ କ୍ରୟ କରୁଥିବାରୁ ବିକ୍ରୟ ନାଟକୀୟ ଭାବରେ ବୃଦ୍ଧି ପାଇଥାଏ । କିନ୍ତୁ, ଉତ୍ସବର ସମସ୍ତ ଆଉଜରେ ଖ୍ରୀଷ୍ଟମାସର ପ୍ରକୃତ ଅର୍ଥ ହଜିଯାଇଛି ।
ପ୍ରକୃତ ଖ୍ରୀଷ୍ଟମାସ ହେଉଛି ସମସ୍ତ ଉପହାର ପ୍ରଦାନକାରୀ ନିଜେ କିପରି ଉପହାର ହୋଇଗଲେ ।
ଖ୍ରୀଷ୍ଟମାସର କାରଣ
ସମୟ ଆରମ୍ଭ ହେବା ପୂର୍ବରୁ, ପରମେଶ୍ୱର ଥିଲେ । ସେ ଜଗତ ଏବଂ ସେଥିରେ ଥିବା ସମସ୍ତ ବିଷୟ ସୃଷ୍ଟି କଲେ । ତାଙ୍କ ପ୍ରେମରେ, ଈଶ୍ଵର ମନୁଷ୍ୟକୁ ଆପଣା ପ୍ରତିମୂର୍ତ୍ତୀରେ ସୃଷ୍ଟି କରି ଏକ ସୁନ୍ଦର ଉଦ୍ୟାନରେ ରଖିଲେ । ମଣିଷ ଈଶ୍ଵରଙ୍କ ନିର୍ଦ୍ଦେଶକୁ ଅବମାନନା କଲା । ଏହି ଅବମାନନା ପାପ ଥିଲା ଏବଂ ଏହା ମନୁଷ୍ୟକୁ ଈଶ୍ଵରଙ୍କଠାରୁ ପୃଥକ କଲା । ସେ ମନୁଷ୍ୟକୁ ସେମାନଙ୍କର ପାପ ହେତୁ ସବୁଦିନ ପାଇଁ ବିନାଶ କରିପାରିଥାନ୍ତେ । କିନ୍ତୁ, ଈଶ୍ଵର ପ୍ରତିଜ୍ଞା କରିଥିଲେ ଯେ ଦିନେ ସେ ଏହି ପୃଥିବୀକୁ ଜଣେ ତ୍ରାଣକର୍ତ୍ତା ପଠାଇବେ ଯେ ସମସ୍ତ ଲୋକଙ୍କ ପାପ ପାଇଁ ଅନ୍ତିମ ବଳିଦାନ ହେବେ । (ଯିଶାଇୟ ୫୩ )
“କାରଣ ପାପର ବେତନ ମୃତ୍ୟୁ, କିନ୍ତୁ ଈଶ୍ଵରଙ୍କ ଅନୁଗ୍ରହଦାନ ଆମ୍ଭମାନଙ୍କ ପ୍ରଭୁ ଖ୍ରୀଷ୍ଟ ଯୀଶୁଙ୍କ ସହଭାଗିତାରେ ଅନନ୍ତ ଜୀବନ ଅଟେ ।” (ରୋମୀୟ ୬:୨୩ ) । ଯୀଶୁ ଈଶ୍ଵରଙ୍କ ପୁତ୍ର । ସେ ପାପ ବିହୀନ ବଞ୍ଚିଥିଲେ ଏବଂ ତାଙ୍କର ସମସ୍ତ ମାର୍ଗରେ ସେ ସିଦ୍ଧ ଥିଲେ । ତିରିଶ ବର୍ଷ ବୟସରେ, ଯୀଶୁ ଲୋକମାନଙ୍କୁ ତାଙ୍କ ପିତା ଈଶ୍ଵରଙ୍କ ବିଷୟରେ ଶିକ୍ଷା ଦେବା ଆରମ୍ଭ କଲେ । ସେ ଅନେକ ଆଶ୍ଚର୍ଯ୍ୟ କାର୍ଯ୍ୟ କରିଥିଲେ ଯେପରିକି ଅନ୍ଧମାନଙ୍କୁ ଦୃଷ୍ଟି ଦେବା, ଅନେକ ଲୋକଙ୍କୁ ସେମାନଙ୍କର ରୋଗରୁ ଆରୋଗ୍ୟ କରିବା, ଏବଂ ମୃତମାନଙ୍କୁ ପୁନରୁତ୍ଥାନ କରିବା । ସର୍ବୋପରେ, ସେ ସ୍ଵର୍ଗରେ ଅନନ୍ତ ଜୀବନର ମାର୍ଗ ପାଇବା ପାଇଁ ଶିକ୍ଷା ଦେଲେ । ତା ’ପରେ ସେ ସମଗ୍ର ଜଗତର ପାପ ପାଇଁ ବଳିଦାନ ଭାବରେ ନିଜ ଜୀବନ ଦେଲେ ।
ଯୋହନ ୩:୧୬ ରେ ବାଇବଲ କୁହେ, “କାରଣ ଈଶ୍ଵର ଜଗତକୁ ଏଡ଼େ ପ୍ରେମ କଲେ ଯେ, ସେ ଆପଣା ଅଦ୍ଵିତୀୟ ପୁତ୍ରଙ୍କୁ ଦାନ କଲେ, ଯେପରି ଯେକେହି ତାହାଙ୍କଠାରେ ବିଶ୍ଵାସ କରେ, ସେ ବିନଷ୍ଟ ନ ହୋଇ ଅନନ୍ତ ଜୀବନ ପ୍ରାପ୍ତ ହୁଏ।”
ସର୍ବଶ୍ରେଷ୍ଠ ବଳିଦାନ ଭାବରେ କ୍ରୁଶରେ ମରିବା ପାଇଁ ଯୀଶୁ ଏହି ପୃଥିବୀକୁ ଆସିଥିଲେ । ତାଙ୍କ ମୃତ୍ୟୁ ଦ୍ୱାରା, ସମସ୍ତ ପାପର ମୂଲ୍ୟ ପ୍ରଦାନ କରାଯାଇଛି । ପାପ ପାଇଁ ବଳି ଉତ୍ସର୍ଗ କରିବାର ଆଉ ଆବଶ୍ୟକତା ନାହିଁ । ତ୍ରାଣକର୍ତ୍ତା ପଠାଇବା ପାଇଁ ଏହା ଈଶ୍ଵରଙ୍କ ପ୍ରତିଜ୍ଞା ପୂରଣ ଥିଲା ।
ଯଦିଓ ଯୀଶୁ ଦୁଷ୍ଟ ଲୋକମାନଙ୍କ ଦ୍ୱାରା ହତ ହୋଇଥିଲେ, ତାଙ୍କ ଉପରେ ମୃତ୍ୟୁର କୌଣସି ଶକ୍ତି ନ ଥିଲା । ତିନି ଦିନ ପରେ, ସେ କବରରୁ ବିଜୟୀ ହେଲେ । ପୁନରୁତ୍ଥାନର ପରବର୍ତ୍ତୀ ଦିନଗୁଡ଼ିକରେ, ଯୀଶୁଙ୍କୁ ଅନେକ ଲୋକ ଦେଖିଥିଲେ । ତା ‘ପରେ ଦିନେ, ତାଙ୍କ ଅନୁଗାମୀମାନଙ୍କୁ ଆଶୀର୍ବାଦ ଦେବା ପରେ, ସେ ସ୍ଵର୍ଗକୁ ଗଲେ ।
ଗ୍ରହଣ କରିବାକୁ ଥିବା ଉପହାର
ଯେତେବେଳେ ଆମେ ଯୀଶୁଙ୍କୁ ବିଶ୍ଵାସ କରିବାକୁ ଏବଂ ନିଜ ଜୀବନକୁ ତାଙ୍କ ନିକଟରେ ସମର୍ପଣ କରିବାକୁ ନିର୍ଣ୍ଣୟ କରୁ, ତାଙ୍କ ରକ୍ତ ଆମକୁ ସମସ୍ତ ପାପରୁ ପରିଷ୍କାର କରେ । ଯେହେତୁ ଆମେ ପରିତ୍ରାଣର ଏହି ଉପହାର ଗ୍ରହଣ କରୁ, ଆମେ ଈଶ୍ଵରଙ୍କ ସହିତ ମିଳିତ ହୋଇଛୁ । ଯୀଶୁ ଆମର ବ୍ୟକ୍ତିଗତ ତ୍ରାଣକର୍ତ୍ତା ହୁଅନ୍ତି, ଏବଂ ଆମେ ତାଙ୍କ ସନ୍ତାନ ହେବାର ଆଶୀର୍ବାଦ ଉପଭୋଗ କରିପାରିବା ! ଯୀଶୁ କିଛିଦିନରେ ଫେରି ଆସୁଛନ୍ତି । ସେ ସମସ୍ତ ପ୍ରକୃତ ବିଶ୍ଵାସୀମାନଙ୍କୁ ସ୍ଵର୍ଗକୁ ନେଇଯିବେ । ସେଠାରେ ସେମାନେ ଈଶ୍ଵରଙ୍କ ସହିତ ସବୁଦିନ ପାଇଁ ରହିବେ ।
ପ୍ରିୟ ବନ୍ଧୁ, ପରିତ୍ରାଣର ଉପହାରଠାରୁ ଆଉ କୌଣସି ଭଲ ଉପହାର ନାହିଁ । ଜୀବନ୍ତ ଈଶ୍ଵରଙ୍କ ପୁତ୍ର ଓ କନ୍ୟା ବୋଲି କହିବା ଅପେକ୍ଷା କୌଣସି ଉତ୍ତମ ଅଧିକାର ନାହିଁ । ଯଦି ଆପଣ ଈଶ୍ଵରଙ୍କ ଏହି ଅକଥନୀୟ ଉପହାରରୁ ବଞ୍ଚିତ ହୁଅନ୍ତି , ତେବେ ଜଗତର ସମସ୍ତ ଉପହାର ମୂଲ୍ୟହୀନ ହେବ ।